Asociación Cultural Fuco Buxán

Homenaxe póstumo a Marcos Ana

A semana pasada chegaban a Fuco Buxán as tristes novas da morte de Marcos Ana, poeta, militante do Partido Comunista, e o represaliado pola ditadura franquista que máis anos botou en prisión.



Como homenaxe póstuma, decidimos poñer á vosa disposición unha serie de material que consideramos interesante, e que encabezamos co texto do artigo que lle adicaba Xesús Alonso Montero e que era publicado o pasado día 26 en La Voz de Galicia:


Marcos Ana: a modo de epitafio
Xesús Alonso Montero

Tamén nos epitafios, ás veces, figuran uns cantos trazos biográficos. Lembro, neste momento, tan triste para min, o epitafio, no cemiterio de Mondoñedo, de Manuel Leiras Pulpeiro. Na súa campa, estes indispensables datos: «Médico e poeta (1854-1912)». E a continuación, o diamante destas palabras: «Amou a verdade e practicou o ben». Son as palabras que me gustaría pronunciar hoxe, ás cinco da tarde, en Madrid, ante o féretro de Marcos Ana: de Marcos Ana o amigo, o camarada, o compañeiro seguro, o humanista, o poeta.

Chamábase Fernando Macarro Castillo, pero na cadea adoptou o nome de Marcos Ana (homenaxe ao pai e á nai) para asinar os versos que saían, clandestinos, da prisión e facer saber ao mundo que alí, nas mazmorras franquistas, durante vinte e tres anos (1939-1962) penou un cidadán comprometido radicalmente co ben común, coa xente do común, que iso -e non outra cousa- é o comunismo.

Os poemas naceron das duras experiencias carcerarias en tempos tan sórdidos e duros, pero eses versos son poesía porque o autor -que non fixera o bacharelato- tiña o don da palabra poética. Sábeno ben os críticos, comunistas ou non, que recitan versos tan prodixiosos como o final de Mi corazón es patio:

«Un patio donde gira / un corazón clavado; / mi corazón, desnudo, / mi corazón, que tiene / la forma gris de un patio, / un patio donde giran / los hombres sin descanso».

Naceu Marcos Ana en 1920, en Alconada, unha pequena aldea da provincia de Salamanca, e pasou os anos da infancia e da adolescencia en Alcalá de Henares, patria do Arcipreste de Hita, de Cervantes e de Manuel Azaña, tres escritores, tres espíritos grandes que hoxe chorarán a morte do noso poeta.

Coñecín a Marcos Ana en Moscova, no verán de 1962, nun Congreso da Paz. Levaba fóra dos muros da prisión sete meses e lembro que miraba case sen ver: aínda non se afixera aos espazos abertos, ás prazas redondas, ás rúas longas. Aínda vivía, case cos ollos pechados, nun patio estreito, no patio dunha prisión.

Marcos Ana, xa fóra, foi un exemplo de solidariedade cunha voz limpa que anunciaba alboradas sen lóstregos nin sequera nubes. Este home, este poeta, escribía, desde a prisión de Burgos, en 1961: «Decidme cómo es un árbol». E continuaba: «Hablo, por hablar, de asuntos / que los años me borraron… / No puedo seguir, escucho / los pasos del funcionario».

Que a terra che sexa leve, Marcos, na compaña dos xustos e dos desherdados, os teus verdadeiros compañeiros.



 A continuación tedes unha reseña con máis material interesante sobre a súa figura que foi publicado estes días, e que en parte compartiremos no noso blog de escolma de opinións "Pensamento Crítico", e que vos convidamos a visitar:


NuevaTribuna.es - "Los pueblos que no conocen su historia están condenados a repetirla" (Entrevista)

NuevaTribuna.es - A mi amigo, Marcos Ana / Javier Balboa

NuevaTribuna.es - Marcos Ana y nuestra triste realidad histórica / Pedro Luis Angosto

LaRioja.com - "Carta urgente a la juventud del mundo", un poema de Marcos Ana








Concentración en apoio da familia de Marta Sequeiro - Luns 28 de novembro, 18:00h, Centro Cívico de Caranza

O pasado venres 25 de novembro tiña lugar ás 10:45 horas na fachada da Casa da Muller unha rolda de prensa da Concellería de Muller e Igualdade coa finalidade de apoiar aos familiares de Marta Sequeiro.







A rolda de prensa estaba convocada para manifestar o malestar pola consideración que deu a Fiscalía ao crime de Marta Sequeiro como homicidio e non como asesinato, indicando que non atopara indicios de ensañamento. Por este motivo, tamén se anunciaba en dita rolda de prensa a convocatoria dunha  concentración que terá lugar o vindeiro luns 28 de novembro, ás 18:00 horas, na explanada do Centro Cívico de Caranza.


Fuco Buxán súmase a esta convocatoria, e convídavos a participar na concentración para esixir xustiza neste crime.


Foro Galego de Inmigración - Inxusta e brutal expulsión express dun xoven veciño de Compostela dende hai máis de 14 anos

Compartimos con vos o comunicado que difundiu o Foro Galego de Inmigración este sábado 26 de novembro sobre a expulsión dun veciño de Santiago dende hai máis de 14 anos:



FORO GALEGO DE INMIGRACIÓN
COMUNICADO DE PRENSA URXENTE


INXUSTA E BRUTAL EXPULSIÓN EXPRESS DUN XOVEN VECIÑO DE COMPOSTELA DENDE HAI MÁIS DE 14 ANOS.


O Foro Galego de Inmigración quere facer público que mañá 26 de novembro, a Polícia Nacional de Santiago de Compostela pretende expulsar a un xoven veciño da nosa cidade de orixe paraguaio. Este rapaz de 19 anos, vive coa súa nai en Santiago de Compostela dende hai máis de 14 anos. Algúns deles baixo a tútela da propia Xunta de Galicia.


Unha vez perdida a súa condición de menor tutelado non conseguíu (como tantas outras persoas) unha oferta de traballo para poder regularizar a súa situación. Tivo un procedemento de expulsión que a Policia pretende convertido en Resolución firme executar xa mesmo.


Detido dende o martes 22 (cremos que sobrepasa o tempo máximo de detención) vai ser trasladado a Madrid con intención de envíalo nun avión dende Barajas, vía Perú, con previsión de chegada a Asunción (Paraguai) na madrugada do sábado ao domingo ás 4 da mañá.


Non ten familia algunha alí. A súa familia, nai e irmán pequeno (naceu aquí en Compostela) residen aquí denda eses mesmos 14 anos. Coincide ademáis que a nai enferma e soa precisa coidados e atención.


Non entendemos o ensañamento que supón facer efectiva a expulsión deste rapaz, que podía quedar co procedemento de expulsión aquí e coa posibilidade pola vía de arraigo social de arranxar a súa situación legal en España. Dada a urxencia da situación convocamos a cidadanía decente a que chame, mande correos, entre na web, no facebook da Polícia pedindo que se frene esta brutal expulsión.


PARA MÁIS INFORMACIÓN: Miguel Fernández (662-307019)
FORO GALEGO DE INMIGRACIÓN
Rúa San Roque 6-bis. C.P. 15704 - Santiago de Compostela
foroinmigracionsantiago@yahoo.es - 981-576 142 






XIII Xornadas do Proxecto Esmelle - Sábado 26 de novembro

O Proxecto Esmelle celebra as súas xornadas anuais, e xa van pola 13ª edición, e que terán lugar o vindeiro sábado 26 de novembro no Local Social de Esmelle dende as 10:30h. Compartimos con vos o programa das mesmas:


Máis información:
http://valledeesmelle.com/
http://www.blogoteca.com/pesmelle/

Marcha Mundial das Mulleres: actos de celebración do 25N, Día Internacional contra a violencia machista

Este venres 25 de novembro, e conmemorando o Día Internacional contra a violencia machista, a Marcha Mundial das Mulleres de Galiza convoca unha concentración na Praza do Inferniño, ás 19:00h.

Fuco Buxán estará alí, e convídate a participar neste acto que a Marcha Mundial das Mulleres está a difundir como segue:

Traballamos durante todo o ano para visibilizar e denunciar as violencias machistas e transformar a sociedade para erradicalas. Este 25N queremos lanzar unha mensaxe en tempos duros nos que as violencias se multiplican: A violencia machista non ten idade: erradiquémola. E queremos lembrar tamén que a violencia machista é contra todas e que as solucións son coletivas. Este 25N, como o resto do ano, saimos ás rúas reclamar unha vida sen violencia #enMarcha #QuerémonosVivas #menunhamenos #nenunhamáis


Máis información:
https://www.facebook.com/marchamundialmulleres.galiza
http://feminismo.info/webgalego/ 

ANPAs e Sindicato de Estudiantes convocan manifestación contra a LOMCE: xoves 24 de novembro ás 12:00h

Compartimos con vos a mensaxe da convocatoria que están a facer dende a Federación Comarcal de ANPAs e o Sindicato de Estudantes dunha manifestación contra a LOMCE e as reválidas, e que sairá o xoves 24 de novembro, ás 12:00h da Praza de Amada García -fronte o edificio administrativo da Xunta, zona Praza de España-. O mesmo día, tamén terá lugar unha concentración, no mesmo lugar, ás 19:00h.

Dende Fuco Buxán, solidarizámonos con estas mobilización e convidámosvos a participar nela.







Estimados compañeiros/as:


Desde a Federación comarcal de ANPAS e o Sindicato de Estudantes poñémonos en contacto con vós para facervos partícipes da situación do ensino público e facervos unha petición de solidariedade.

Como sabedes, a comunidade educativa levamos cinco anos loitando contra os graves ataques do goberno do PP contra a educación pública, simbolizados na LOMCE e no 3+2 universitario. Eses ataques buscan degradar unha das conquistas históricas máis importantes do movemento obreiro: un ensino público de calidade e gratuíto, fundamental para que os fillos e as fillas dos traballadores podamos optar a un futuro mellor.

A todo isto se lle sumou, o pasado xullo, un decreto para implantar reválidas. Este novo ataque, aprobado con “estivalidade e alevosía”, como facía o franquismo, provocou unha gran folga estudantil o pasado 26 de outubro, que encheu as rúas de 8 localidades galegas e máis de 100 localidades de todo o Estado español.

Desde ese día, as manobras sucédense. Ao día seguinte, Rajoy anunciou, dende a tribuna do Congreso dos Deputados durante a sesión da súa investidura, que as reválidas non terían efecto académico este curso. Foi unha manipulación e un insulto á intelixencia, posto que o propio decreto de xullo xa o recolle así.

A isto seguíronlle anuncios do ministro de Educación que buscan descaradamente desmobilizar: que se as reválidas poderían non ter nunca efectos académicos, que se a de 2º de Bacharelato non terá que facela quen non vaia ir á universidade, que se se aprobará cun 4...

O último exemplo estámolo vendo en vivo e en directo hoxe, cunha intensa campaña mediática que pretende transmitir á opinión pública que a LOMCE está liquidada. Non é así. O que aprobou o Congreso dos Deputados onte foi unha SUSPENSIÓN da aplicación da LOMCE. Para nós isto é insuficiente porque o que reivindicamos as ANPAS e o Sindicato de Estudantes é a súa total DERROGACIÓN, ademais da anulación das reválidas franquistas.

Para conseguir este obxectivo, o vindeiro xoves 24 de novembro temos convocada unha nova folga, tanto estudantil en Secundaria como de pais e nais en todos os niveis do ensino. Ese día manifestarémonos en Ferrol ás 12 do mediodía. Neste sentido, queremos pedirvos a participación dos traballadores de Navantia nesta manifestación. Sería moi importante porque lle daría máis relevo ao rexeitamento social a todas as medidas reaccionarias tomadas polo PP no terreo educativo.

Calquera persoa que viva en Ferrolterra está afeita a que ás veces os traballadores de Navantia nos pidades solidariedade ao resto da sociedade. Hoxe, é a comunidade educativa da comarca a que vos pide axuda aos traballadores de Navantia porque consideramos que o ensino público gratuíto e de calidade é unha conquista social e que todos debemos defendelo. En espera da vosa resposta, sobre a cal non temos ningunha dúbida, recibide un saúdo.


Ferrol, a 16 de novembro de 2016.



FEDERACIÓN DE ANPAS DE FERROLTERRA

SINDICATO DE ESTUDANTES


Máis información:

www.anpasgalegas.org
fanpaferrolterra@gmail.com
http://sindicatodeestudiantes.net/

Axuda a que o documental "Los Subversivos" -sobre o papel da ONU nas investigacións por desaparicións e torturas- vexa a luz

Gaia Audiovisuals, unha produtora de cine coa que dende 1998 se produciron documentais e películas de ficción, entre as que se achan “Game Over” -documental ganador do Premi Gaudí 2016-, ou “Neckan” -un thriller sobre os nenos roubados do franquismo, ambientado en Tetuán en 1956 e  que se estreará a principios de 2017- están actualmente no proceso de montaxe do documental “Los Subversivos”.


O documental artéllase ao redor da figura de Theo van Boven – director de Dereitos Humanos da ONU entre 1977 y 1982 –, que fortaleceu desde dentro o funcionamento da ONU en relación aos Dereitos Humanos, arriscando a súa propia vida e sendo destituído do seu cargo. A partir de aí explica a evolución na investigación dos crimes contra a humanidade dalgunhas ditaduras do s.XX, centrándose en Chile, Arxentina e España. O documental amosa como neste último país hai milleiros de persoas tentando romper o silencio sobre os crimes contra a humanidade que tiveron lugar durante a ditadura Franquista. Segundo as manifestacións de Baltasar Garzón no documental, España é o segundo país do mundo con máis desaparecidos, despois de Cambodia. Aínda así, en 80 años non se fixo nin unha soa investigación ao respecto.

Para poder rematar e difundir o documental, que non conta co financiamento de ningunha televisión nin ningunha institución en España -podedes imaxinar o motivo-, o 14 de novembro lanzaron unha campaña de "crowdfunding" a través de Verkami, plataforma de referencia para este tipo de financiamento.  Pódese acceder á información sobre o documental e a campaña, na seguinte ligazón: [Verkami - Los Subversivos].


O funcionamento é moi sinxelo: so hai que decidir que aportación se quere facer na columna da dereita da pantalla, e rexistrarse introducindo os datos persoais e un número de tarxeta de débito ou crédito. Segundo nos informa a produtora, a aportación so se cargará na tarxeta en caso de que o proxecto chegue ao obxectivo marcado -que é de 20.000€-. Se non se alcanza non haberá cargo algún.

Para ver un avance do documental, pode facerse na seguinte ligazón: https://vimeo.com/191464067

Máis información:
gaiaaudiovisuals@gaiaaudiovisuals.com
https://www.facebook.com/The-Subversives-1009262425812956/?fref=ts

Primeiro Acto "Homenaxe a unha Vida de Militancia” de EU Narón, adicado a Manola López e Ricardo Aneiros

O pasado xoves  17 de novembro tiña lugar o primeiro acto "Homenaxe a unha Vida de Militancia”, organizado por Esquerda Unida Narón, e que serviu coma sentida homenaxe a unha vida de militancia a dúas persoas históricas na loita política, social e sindical da comarca: Manuela Dolores López García -Manola- e Ricardo Aneiros Sixto.

Sumándonos a esta homenaxe, estiveron presentes nel varios membros de Fuco Buxán.

Para ver máis fotografías do evento, pulsa na imaxe


Para quenes non coñezan a traxectoria dos homenaxeados, compartimos o discurso que o seu compañeiro de EU Narón e actual concelleiro, André Abeledo, lles brindou nese evento:

“Hai mulleres e homes que loitan un día e son bos. Hai outros que loitan un ano e son mellores. Hai quen loita moitos anos, e son moi bos. Pero os hai que loitan toda a vida: eses son os imprescindibles.”
― Bertolt Brecht
Este é o caso dos camaradas que imos homenaxear hoxe, un homenaxe merecido, Manola e Ricardo entregaron a súa vida a loita por construír un futuro mellor para todas e todas, eles decidiron compartir unha vida dedicada a militancia comunista.

 Lembro cando o meu fillo maior preguntoume que era ser comunista, eu contesteille que uncomunista é una persoa que pensa que calquera persoa, polo feito de haber nacido ten dereito a unha vida digna e a ter as súas necesidades básicas cubertas, é una persoa que pensa que a economía ten que estar ao servizo do ser humano e non o ser humano ao servizo da economía, é unha persoa que pensa que temos que traballar para vivir e non vivir para traballar, é quen considera que a patria é a clase obreira e quen pensa que a solidariedade, a igualdade, a fraternidade, e a xustiza social son os cimentos dun futuro socialista.
Ricardo é Manola sonche sen dubida deste tipo de persoas.

Manuela Dolores López García, a miña camarada, unha rapaza de 70 anos, unha traballadora incansable membro activo do CPL de EU Narón e militante comunista incansable, traballou toda a súa vida no campo, foi vendedora na praza de Recimil, co-fundadora da Asociación de Vendedores de Recimil e da AAVV de A Gándara.
Durante a ditadura traballou na clandestinidade facendo propaganda para o partido comunista. E ademais de todo o falado, foi nai de dous fillos.

Ricardo Aneiros Sixto de 73 anos, un loitador incansable, que como eu hoxe chegou a ser concelleiro en Narón, un sindicalista, un militante comunista consecuente que pagou o alto prezo da loita pola utopía socialista.
Estivo preso durante 4 meses en 1972 polos sucesos de 10 de Marzo, foi un de aqueles valentes que xunto con Amador e Daniel tiveron o valor de dar un paso o fronte contra a ditadura franquista.
Formou parte do proceso no xuízo dos 23, saíndo absolto, foi despedido de ASTANO como represalia para logo volver a ser readmitido.
Foi detido novamente en 1973 entrando en prisión durante catro meses, grazas a loita e a presión dos seus compañeiros volveu a ser readmitido na empresa.
Dúas veces máis foi detido sen chegar a entrar en prisión.
En 1974 volveu a ser detido e enviado a cadea durante tres meses.
Este é só un pequeno resumo de dúas vidas inmensas, de dous camaradas exemplares, de dous militantes comunistas que loitaron dun xeito incansable para defender os intereses da clase obreira.
Grazas a eles, e outros camaradas como eles, conseguimos os dereitos que hoxe nos estamos deixando roubar, foron eles os que con sangue, suor e bagoas defenderon a dignidade da clase obreira en plena ditadura fascista, e o continuaron a facer nesta falsa democracia.
Grazas camaradas, polo voso esforza, polo vosos sacrificio, e sobre todo polo voso exemplo militante que nos marca o camiño a seguir, o camiño da loita e da dignidade.
Camaradas que viva a clase obreira e o Partido Comunista.”

Máis información: https://elcomunista.net/2016/11/18/primeiro-acto-homenaxe-a-unha-vida-de-militancia-de-eu-naron-2/

Homenaxe a Ángeles Rivera Torres "Gelines" - Mércores 23 de novembro, 20h, Ateneo Ferrolán

Este mércores 23 de novembro, ás 20:00h, Fuco Buxán organiza unha homenaxe á nosa compañeira Ángeles Rivera Torres "Gelines" no Ateneo Ferrolán.




Gelines naceu en Ferrol Vello en 1938, no seo dunha familia traballadora e de esquerdas. Entrou a traballar na PYSBE con tan so 14 anos, e pronto liderou a loita por mellorar o salario e as duras condicións laborais na factoría. Detida e xulgada no TOP -Tribunal de Orde Pública-, padeceu o rigor dos cárceres da ditadura. Máis tarde coñecería a emigración, e a separación da súa familia.

Hoxe día continúa sendo partícipe desa cultura da solidariedade, estando presente en tódolos movementos sociais na procura dunha sociedade mellor.

É por isto que os seus compañeiros e compañeiras de Fuco Buxán convidámosvos a asistir a este acto que servirá como sinxelo recoñecemento a unha vida de compromiso.

STOP Desafiuzamentos Coruña - Un xuíz da Coruña decide que o mellor para unha afectada é que a desafiucen

Compartimos a seguinte nota de prensa de STOP Desafiuzamentos Coruña e a convocatoria de concentración diante da Audiencia Provincial da Coruña que terá lugar este venres 18 de novembro, ás 12:00h. Dende aquí, a nosa solidaridade coas persoas afectadas por un procedemento de desafiuzamento e pola reclamación dunha solución xusta e acorde coa legalidade europea.




UN XUÍZ DE A CORUÑA DECIDE QUE O MELLOR PARA UNHA AFECTADA E QUE A DESAFIÚCEN

A Coruña, 17 de Novembro de 2016. Este venres, 18 de Novembro ás 12:00h concentrarémonos diante da Audiencia Provincial de A Coruña.

O titular do xulgado de primeira instancia número 11 de A Coruña, ditou sentenza no caso da nosa compañeira Sandra, declarando que o mellor para ela é que a desafiúcen, saltándose así toda a doutrina do TXUE, que é de obrigado cumprimento para os Estados membros.

A pesares de que a doutrina do Tribunal de Xusticia da Unión Europea di que a cláusula de Vencemento Anticipado, que permite as entidades financeiras reclamar, pola falta de pagamento dalgunhas cotas da hipoteca a totalidade da débeda pendente é abusiva, ten que ser declarada nula e, polo tanto, débese arquivar o procedemento de execución hipotecaria para así disuadir os bancos de incluír cláusulas abusivas nos seus contratos, desgraciadamente non soe ser así nos xulgados da Coruña namentres que noutros xulgados de Galicia e España isto non acontece.

Os xuíces da Coruña non so non aplican esta doutrina, senón que deciden polos afectados, dicindo que o procedemento executivo, nestas circunstancias declarado ilegal pola xustiza europea, é o mellor para eles. Este é o caso das nosas compañeiras Magdalena, Pablo, Lola, Sandra e Aurelia ( PAH Ferrol).
Dende Stop Desafiuzamentos A Coruña e a PAH de Ferrol, queremos denunciar as prácticas contrarias a normativa do TJUE, que os xuíces desta provincia están a realizar.

A pesares dos intentos realizados para denunciar esta situación ante o Xuíz Decano D. Luís Pérez Merino,non acadamos nada.
Os xuíces desta provincia non só están a deixar desprotexidos aos afectados, se non que deciden por eles sen lles preguntar, inclinando así, unha vez máis, a balanza a favor da banca, en vez de lles ofertar aos afectados unha alternativa menos traumática que perder a súa vivenda.

Por todo isto concentrarémonos mañá venres día 18 de novembro as 12 h diante da Audiencia Provincial de A Coruña, acompañados polos avogados Maite Ortiz e Xosé María Erauskin (639 38 74 85 ), Stop desahucios (617 82 95 47) , outros colectivos sociais e autoridades políticas.



DIA
HORA
LUGAR
VENRES  18 – 11 – 16
12:00h
Audiencia Provincial Coruña



Moitas grazas pola vosa atención

¡NIN CASAS SEN XENTE, NIN XENTE SEN CASA!

18 novembro, 19:30h, Sargadelos - Mesa redonda "Desmontando a LOMCE"

Temos o pracer de anunciar que a Área de Xuventude de Fuco Buxán organiza o vindeiro venres 18 de novembro, ás 19:30h, na Galería Sargadelos, unha mesa redonda baixo o título "Desmontando a LOMCE - proposta de un modelo educativo baseado na selección, segregación e desigualdade", na que participarán Javier Sánchez -presidente da Federación Galega de ANPAs-, Jurjo Torres -Catedrático de Universidad de Didáctica y Organización Escolar na Faculdade de Ciencias da Educación da Universidade da Coruña-, e Francisco Fernandez -portavoz del Sindicato de Estudiantes de Ferrol-.



*Imaxe do cartaz por cortesía de Antía DC -Fotografía-


Non é unha nova lei o que a sociedade española demanda, senón políticas que melloren a educación, políticas que se pacten coa comunidade escolar, coas distintas forzas sociais e cos partidos políticos.

Esta lei:

  • Entende a educación como unha carreira de obstáculos salpicada de probas externas e reválidas que pecharán o paso a persoas con dificultades de aprendizaxe.
  • Devolve unha formación profesional devaluada (FP dual), con gran parte da formación en empresas que non manifestaron ningún tipo de interés nin intención de financiar activamente esta modalidade.
  • Reduce drásticamente a participación democrática en tanto que os consellos escolares perden competencias. 
  • Desvaloriza as distintas linguas oficias do Estado reforzando que as Administracións Públicas garanten o dereito do alumnado a estudar en castelán.
Con esta mesa redonda, pretendemos incidir nas claves desta lei dende tres puntos de vista -ANPAS, educadores e estudantes-.

Inauguración da exposición "Quessada e o seu tempo" - Venres 19 de novembro, 19h

Temos o grandísimo pracer de convidarte á inauguración da exposición "Quessada e o seu tempo" que organizamos en conxunto coa Fundación Xaime Quessada Blanco e o Concello de Ferrol dentro dos actos realizados para a celebración do Ano Quessada. A inauguración terá lugar este venres 18 de novembro de 2016, ás 19:00h no Centro Torrente Ballester.




Este xoves 17 de novembro, ás 12:00, no Concello de Ferrol terá lugar unha rolda de prensa na que se anunciará este acto de xeito oficial.

O Ano Quessada do Concello de Ferrol comenzaba o pasado 2 de marzo coa apertura ao público da montaxe no Auditorio de Caranza de dous inmensos murais de Xaime Quessada Porto (Ourense 1937-2007), un dos artistas plásticos galegos con mais proxección internacional. Desde entón, locen nas paredes do recibidor e no primeiro andar deste contedor cultural da cidade, logo de moitos anos ocultos e mesmo desterrados, como parte do patrimonio artístico municipal para o desfrute colectivo.

Asemade. o pasado 13 de maio tiña lugar no Centro Cultural Torrente Ballester unha mesa redonda sobre a figura de Quessada que afondaba nos distintos aspectos do artista: a súa personalidade artística e cultura, a súa ligazón sociopolítica e os vínculos literarios. Nela, participaron como poñentes, Vicente Álvarez Areces, expresidente do Principado de Asturias, quen lembrara o compromiso político e social de Quessada no contexto da cidade; Darío Villanueva, director da Real Academia Española, e José Gómez Alén, experto na figura do artista plástico.



Agardamos a vosa presenza

AGAVIDA - Venres 18 de novembro, 9:30 - 19:00 : Xornada "Amianto: efectos, normativa e dereitos"

Compartimos con vos a invitación que nos fai chegar AGAVIDA para participar nas xornadas que organiza este vindeiro venres 18 de novembro:




Os membros da Xunta Directiva de AGAVIDA, queremolos invitar a Xornada, sobre o Amianto que se celebrará no restaurante Illas Gabeiras, o vindeiro día 18 de novembro de 2016, co título:
AMIANTO, EFECTOS, NORMATIVAS E DEREITOS

Axuntamos programa de actos:





Por motivo de organización rogamos nos confirmen asistencia a maior brevedade posible.

Reciban UN CORDIAL SAÚDO


Xunta Directiva




Xornadas contra a violencia de xénero - 16 e 17 de novembro, 19:30h

Compartimos esta invitación que nos fan chegar da Asociación de Mulleres do Barrio de Caranza e a Asociación cultural e artística Ti e máis eu Teatro a propósito dunhas xornadas contra a violencia de xénero que organizan os vindeiros mércores 16 e xoves 17 de novembro, a partires das 19:30h no Centro Cívico de Caranza:




A Asociación de Mulleres do Barrio de Caranza e Asociación Cultural e Artística Ti e máis Eu Teatro estamos a traballar na preparación dunhas xornadas contra a violencia de xénero.

Con estes actos queremos lembrar un problema social contra o que debemos loitar cada día. Non só polo dereito á vida e o respecto que merece cada persoa e, neste caso, as mulleres; senón tamén polas fillas e fillos que sofren as consecuencias da VIOLENCIA DE XÉNERO.

Ser MULLER supón ás veces un risco no noso país, e en moitas outras nacións a anulación total como persoa.

Por iso gustaríanos contar coa túa presenza os días 16 e 17 de Novembro a partires das 19:30 h. no Centro Cívico de Caranza.

A LOITA CONTRA A VIOLENCIA DE XÉNERO É COUSA DE TOD@S.
 

NON FALTES!

Saúdos e moitas grazas.
 

Asociación de Mulleres do Barrio de Caranza (Mercedes Leal Novo)
Asociación cultural e artística Ti e máis eu Teatro (Angeles RodrÍguez Montero)

Mostra "Cinema e Sociedades 2016" - Mércores 16 de novembro, 19h : Empoderamento da Muller

Compartimos unha semana máis información dos actos relativos á Mostra "Cinema e Sociedade 2016" que están a ter lugar no Ateneo Ferrolán. Esta semana, o mércores 16 de novembro ás 19h estará centrado no empoderamento da Muller e durante o cal se realizará un recital de poesía


Rádio FilispiM - Venres 11 de novembro : Estrea do Documentário "10 anos de Rádio Livre e Comunitária"

A Radio FilispiM, 93.9FM estrea este venres 11 de novembro, ás 20:30h, no Ateneo Ferrolán, o documental "10 anos de radio libre e comunitaria", e como non podía ser doutro xeito, compartimos a invitación a este evento:


A estrea do documental sobre os 10 anos da Rádio Livre e Comunitária da Terra de Trasancos, Rádio FilispiM, que se estreará o Venres 11 de Novembro de 2016 às 20:30h. no Ateneo Ferrolán.
Queremos agradecer ao equipo que desinteresadamente, con agarimo e profesionalidade crearon este documental: Juanpa Ameneiros, Xende Lôpes e Óscar Quant. Un traballo fantástico! ao Ateneo Ferrolán por acollernos dende o principio e á A.C. Fuco Buxán por facilitarnos o noso local, a ese feixe de músicos, artistas e persoas en xeral que colaboraron xenerosamente connosco e nos prestaron axuda cando a necesitamos, a quen colabora dalgún xeito coa radio: facendo programas, escoitando, divulgando, como socias ou socios colaboradores, mercando material, rifas, CDs, camisolas, chapas, asistindo ás nosas sesións vermú, ós ciclos de cinema ou o festival Conspirando por umha Rádio Livre, a quen participa nas exposicións e nos FilispiM Vai!, a quen da sentido a este proxecto servíndose del para difundiren as súas actividades e reivindicacións ou escoitándo ao outro lado do aparato. 
Grazas a quen puxo parte do seu tempo e adicación dentro do Colectivo OPAÍÍ.

Ao voso servizo estamos.

 
Máis información e vídeo promo: http://opaii.blogspot.com.es/2016/10/estrea-do-documentario-10-anos-de-radio.html

Comunicado do Sindicato de Estudantes chamando a mobilizarse o 24 de novembro

Compartimos o comunicado que nos chega dende o Sindicato de Estudantes, no que se fai un chamamento a mobilizarse o vindeiro 24 de novembro contra a LOMCE e as reválidas:









Carta aberta do Sindicato de Estudantes

ÁS NAIS E PAIS, ÁS ANPAS E Á FEDERACIÓN DE ANPAS DE FERROLTERRA

Os anos de goberno do PP están sendo un auténtico pesadelo para o ensino público. Recortes nos orzamentos, despedimento de milleiros de profesores, leis reaccionarias (LOMCE) e medidas regresivas. O último exemplo témolo coas reválidas, aprobadas por un decreto do goberno en funcións de Rajoy a finais de xullo; ata nas formas se parecen ó franquismo.

Pero estes anos tamén viron unha intensa mobilización da comunidade educativa en defensa dun ensino público de calidade. De feito, esa mobilización conseguiu acabar cun ministro odioso como Wert.

A última proba da utilidade da mobilización vímola o 26 de outubro, na folga estudantil en Secundaria e a folga de pais e nais en todos os niveis educativos convocadas a nivel estatal polo Sindicato de Estudantes e pola CEAPA (a confederación estatal de ANPAS) respectivamente. Ese día, centos de milleiros de estudantes e traballadores manifestámonos contra as políticas do PP para demoler o ensino público. A resposta foi tan masiva, que o goberno empezou a manobrar ó día seguinte, co anuncio por parte de Rajoy, durante o seu discurso de investidura no Congreso dos Deputados, de que este curso as reválidas non terían efectos académicos (o que en realidade non era ningunha novidade, posto que xa estaba contemplado así no decreto de xullo). Desde ese día, o PP lanza mensaxes de que estaría disposto a suprimir definitivamente os efectos académicos das reválidas, pero mantendo estas.

Nesta situación, queremos compartir con todas e todos vós unha reflexión: non acabamos de entender por que o 26 de outubro a Federación de ANPAS de Ferrolterra non se sumou á folga de pais e nais. Cremos sinceramente que foi un erro.

E cremos que foi un erro, en primeiro lugar, porque moitos pais e nais estaban a favor desa folga, e de feito fixérona, como demostrou a súa presenza acompañados polo seus fillos de Primaria na manifestación do Sindicato de Estudantes celebrada na mañá do 26 en Ferrol. E en segundo lugar, porque restar masividade ás manifestacións ese día só podía ter un beneficiario: o goberno do PP.

O PP está tratando de desactivar a mobilización. Pero como o propio Rajoy dixo na sesión de investidura, está disposto a aprazar a posta en marcha das súas políticas, pero non a cambialas. Ó Sindicato de Estudantes non lle chega unha moratoria. Esiximos a total anulación das reválidas e a derrogación da LOMCE, esiximos un ensino público de calidade.

Para conseguir estes obxectivos, a mobilización debe continuar. Por iso, o Sindicato de Estudantes convoca de novo folga en Secundaria (entre 3º da ESO e 2º de Bacharelato) para o xoves 24 de novembro. E neste senso vai o noso chamamento.

O Sindicato de Estudantes chámavos a que en tódolos colexios e institutos de Ferrolterra debatades a convocatoria dunha folga de nais e pais o 24 de novembro e a celebración dunha manifiestación unitaria en Ferrol do Sindicato de Estudantes e a Federación comarcal de ANPAS. 


Isto non só sería importante para contrarrestar as manobras desmobilizadoras do PP e aumentar a presión sobre o goberno. O ensino público universal e de calidade foi unha conquista do movemento obreiro para garantir que os nenos e nenas de clase traballadora, que somos a gran maioría, tivésemos un futuro mellor. O PP quere arrebatarnos ese futuro e converternos en carne de explotación para empresarios sen escrúpulos. Por iso, desde o Sindicato de Estudantes pensamos que unha folga de estudantes e ANPAS o 24 de novembro tamén permitiría que fixésemos un chamamento conxunto ó movemento obreiro para que os traballadores se sumen á nosa manifestación, empezando polas federacións de Ensino dos sindicatos de clase e continuando por Navantia e outras empresas, como xa ten acontecido nalgunha ocasión. Porque é moito o que está en xogo. Nin máis nin menos que o futuro das novas xeracións e, con elas, o futuro de toda a sociedade.

Centro Social A Comuna (A Coruña) - 10 novembro, 20h : charla sobre a planta de Reganosa na Ría de Ferrol

 Compartimos o anuncio que fan dende o Centro Social A Comuna da Coruña dunha charla que terá lugar o xoves 10 de novembro no seu local por parte do Comité Cidadán de Emerxencia.




A Comuna acolle unha charla sobre a planta de Reganosa na Ría de Ferrol
O Comité Cidadán de Emerxencia para a Ría de Ferrol falará sobre a ilegalidade, perigosidade e impacto desta instalación
A Coruña, 9 de Novembro de 2016 – Cada gaseiro que entra no estuario ferrolán é recibido cunha concentración do Comité Cidadán de Emerxencia da Ría de Ferrol, colectivo que afirma que o caso de Reganosa é un dos exemplos máis claros das peores prácticas políticas e económicas que sufriu o país nos últimos anos e das súas consecuencias. Co motivo de que non se repita e se difunda esta loita, a agrupación acudirá ao Centro Social Autoxestionado A Comuna para explicar esta problemática a partires das 20.00 horas.








 

Esta plataforma afirma que a instalación da planta de Gas Natural
Licuado (GNL) de Reganosa na Ría de Ferrol está rodeada de especulación urbanística, decisións políticas que buscan favorecer intereses privados, infraestruturas innecesarias, un sistema enerxético inxusto, elevación do prezo da electricidade, dano ao medio ambiente e manipulación informativa. Sosteñen que a infraestructura situada en Mugardos non foi outra cousa que un agasallo posto nas mans dunha empresa privada (neste caso o Grupo Tojeiro), que se enriqueceu sen tomar apenas riscos económicos e sen competencia.

O colectivo terá a oportunidade de explicar as numerosas ilegalidades que se cometeron no proxecto e funcionamento da planta como, por exemplo, o acordo do goberno eximindo a Reganosa da Avaliación de Impacto Ambiental ou que, pese a varias sentenzas do Tribunal Supremo anulando as Autorizacións Administrativa e de Funcionamento, as instalacións continúen activas.

Título
Reganosa, ilegal e perigosa, Fóra da Ría polo Comité Cidadán de
Emerxencia para a Ría de Ferrol
Día
Xoves 10 de Novembro de 2016
Hora
A partires das 20.00 horas
Lugar
Centro Social A Comuna
(Verea do Polvorín, 35)

Mostra "Cinema e Sociedade 2016" - Xoves 10 de novembro, 19h : explotación da infancia

Compartimos unha semana máis información dos actos relativos á Mostra "Cinema e Sociedade 2016" que están a ter lugar no Ateneo Ferrolán. Esta semana, o xoves 10 de novembro ás 19h estarán centrados na explotación da infancia:

 

ASC Muíño do Vento - Xoves 10 de novembro: conferencia "O XORNALISMO GALEGO, Breve percorrido histórico"

Compartimos a seguinte invitación da A.S.C Muíño do Vento de Canido:


A Directiva da ASC Muíño do Vento-Canido comprácese en convidar á conferencia "O XORNALISMO GALEGO, Breve percorrido histórico" que o vindeiro xoves 10, ás 20 horas, no Centro Cívico de Canido, impartirá o profesor Xosé María Dobarro e presentará o xornalista Germán Castro.
 

Esperando sexa de interese,reciba un saúdo.

ASC MUÍÑO DO VENTO-CANIDO.

Ciclo "Democracia e Compromiso" - Vídeos da conferencia de José Antonio Martín Pallín do pasado 04/11/2016

Para aquelas persoas que non puideran asistir, compartimos os vídeos coa conferencia íntegra que protagonizaba José Antonio Martín Pallín o pasado 4 de novembro baixo o título "A globalización, causa da corrupción?" e dentro do Ciclo "Democracia e Compromiso".


 






Podedes atopar estes e outros vídeos na nosa canle de Youtube, e concretamente na lista de reproducción do Ciclo "Democracia e Compromiso".

Memoria histórica: agardando o enterro de Vicente Peña Tarrasa

En próximas datas será dignamente soterrado en Ferrol o noso conveciño Vicente Peña Tarrasa, Condestable da Mariña Republicana e membro da IV Agrupación do Exército Guerrilleiro de Galicia.

A súa semblanza, escrita pola súa filla Antía, está recollida en “RETALLOS DA MEMORIA” publicada no 2007, pola ASOCIACIÓN MEMORIA HISTÓRICA DEMOCRÁTICA.


https://archive.org/stream/retallos-memoria-1/retallos_01_08_antia_pena_diaz#page/n0/mode/2up


A pasada semana a Asociación para a Recuperación da Memoria Histórica procedeu a exhumación dos seus restos e os doutros tres compañeiros soterrados no Cemiterio de Páramos en 1949 e estánse a realizar as probas de identificación na Universidade de León (Campus de Ponferrada), rematados estes trámites, os restos serán entregados as súas familias.


Vicente Peña (Comisario Político), José Mª Castelo Mosquera “Doctor” (Xefe do Destacamento) Manuel Pena Camino, Carmen Temprano Salorio e Manuel Ramiro Souto, membros do Destacamento “Manolito Bello” de IV Agrupación, foron cercados pola Garda Civil, o 5 de marzo de 1949, na casa da familia Teiga, en Aro – Zas – Negreira. Tras duro combate, no que morreu Carmen, conseguiron escapar acompañados de Manuela Teiga , sendo abatidos todos horas despois, agás Ramiro, nos montes de Páramos (Val do Dubra).



Vicente Peña Tarrasa, “Pedro Borrás” naceu en 1904 en Palma de Mallorca. Residente en Narón, era Condestable da Armada en Ferrol. en outubro del934, xunto con Venancio Pérez,na costa de Asturias, bloqueou os sistemas de tiro do seu buque e tirou os cierres ao mar, para impedir que se disparase contra os mineiros en folga. A raíz do golpe fascista do 36, está a piques de ser fusilado sendo obrigado a facer a guerra no bando fascista. Na posguerra afiliase ao P.C.E. colaborando co “Socorro Vermello”. En 1946, descuberta a súa militancia incorpórase á Guerrilla, formando parte dos destacamentos “Eive-Carbón” e “Manolito Bello”, caendo abatido pola Garda Civil, en Val do Dubra, o 5 de marzo de 1949.




 Máis información: http://memoriahistorica.org.es/s1-news/c3-destacado/antia-encuentra-a-su-padre-67-anos-despues/

REGANOSA: grave infracción de seguridade

O Comité Cidadán de Emerxencia para a Ría de Ferrol, denuncia unha nova infracción de REGANOSA, un novo incumplimento da Normativa de Seguridade, que establece que non poden atracar simultaneamente buques na Planta de Gas a menos de 200 metros.


O día 5 de novembro, a escasa distancia do Gaseiro METHANE PRINCESS que efectúa a descarga de Gas Natural Licuado, está atracado o buque de productos químicos BOMAR CERES.
Ubicación do buque METHANE PRINCESS


Ubicación do buque BOMAR CERES



Isto sucede nunha planta de Gas, ilegal e perigosa ubicada ao pé das nosas vidas e co potencial multiplicador da Planta Forestal del Atlántico.



PLANTA DE GAS : PECHE XÁ !

Máis información: http://www.comitecidadan.org

Tupamaros e cine: da loita armada á presidencia. 30ª edición Cineuropa en Santiago de Compostela

Compartimos a seguinte mensaxe que nos chega do Consulado de Uruguay en Galicia, convidándonos a asistir á proxección de películas na 30ª edición de Cineuropa relacionadas co Movimiento de Liberación Nacional - Tupamaros.




En el marco de la 30 edición del Festival Cineuropa en Santiago de Compostela se presentará una muestra de cine dedicada al Movimiento de Liberación Nacional- Tupamaros. Las películas que componen este ciclo son: El círculo (2008) de Aldo Garay y José Pedro Carlo, Siete instantes (2010) de Diana Cardozo, El Almanaque (2012) de José Pedro Charlo, Memorias de mujeres (2005) de Virginia Martínez, Estado de Sitio (1973) de Costa-Gavras y Mujica: el Presidente (2016) de Heidi Specogna.

Los horarios y salas podrán consultarse en la web del festival www.cineuropa.gal

Las entradas costarán 4 euros, pudiendose adquirir un abono de 10 películas a 30 euros.


Atentos Saludos. 


Consulado del Uruguay en Galicia.




ADEGA - Sábado 5 de novembro: Mesa sobre transporte público

Compartimos a invitación que nos fai chegar ADEGA Ferrolterra sobre unha mesa sobre transporte público que celebrarán esta fin de semana:




Estimado colectivo simpatizante: 


Este sábado 5 de Novembro esta delegación vai desenvolver un acto consistente em montar unha mesa informativa, pra falar coa cidadanía da necesidade, ventaxas e beneficios de usar o transporte público e meios de movilidade nom contaminantes como é a bicicleta, no noso día a día pra ir deixando aparcado o carro privado. Será entre as 11.30-13h na Praza de Armas ao lado das escaleiras do concello de Ferrol. Convidamos vos a que pasedes por ali e asi poderemos coñecervos e INTERCAMBIAR IMPRESIÓNS SOBRE ESTE TEMA O OUTROS QUE SEXAN DA VOSA PREOCUPACIÓN ECOLÓXICA

Sen máis recibe unha forte aperta ecoloxista

Miguel Anjo (secretario Adega-Ferrolterra)

adegatrasancos@adega.gal 


ADEGA (Asociación pola Defensa Ecolóxica de Galiza) 
Delegación de Ferrolterra 
Apartado de Correos 481, C.P.: 15480 - Ferrol
ASÓCIATE!!! www.adega.gal > Delegacións > Ferrolterra

Ciclo Democracia e Compromiso - Venres 4 de novembro, 20h, Jose Antonio Martín Pallín - A Globalización ¿causa da corrupción?

O vindeiro venres 4 de novembro, ás 20:00h, no Centro Cultural Carvalho Calero de Ferrol reiniciamos o noso Ciclo "Democracia e Compromiso" coa presenza do ex-fiscal de Maxistrado emérito do Tribunal Supremo Jose Antonio Martín Pallín, que protagonizará a conferencia "A Globalización ¿causa da corrupción?"



José Antonio Martín Pallín (A Coruña, 1936), destacado xurista coñecido pola súa insubornable independencia, foi fiscal do Tribunal Supremo i é maxistrado emérito do mesmo na actualidade. Foi Presidente da Asociación pro Derechos Humanos de España, Presidente tamén da Unión Progresista de Fiscais e Portavoz de Jueces para la Democracia. Membro de varias organizacións de xuristas, colabora con Amnistía Internacional e coa Comisión Internacional de Juristas en misións de investigación sobre Dereitos Humanos en Latinoamérica e Palestina. Foi galardoado có Premio Jurista 1996 da Universidade Complutense de Madrid e tamén có Premio Nacional de Dereitos Humanos no 2006.

Coa devandita conferencia-coloquio,  damos continuidade ó ciclo que baixo o título xenérico DEMOCRACIA E COMPROMISO indaga nas claves políticas e pretende contribuír ó debate sobre a profunda crise sistémica na que estamos inmersos. A tal fin, seguiremos convidando a prestixiosos analistas que darán a súa visión dende perspectivas progresistas e de esquerdas. 


Comité Cidadán de Emerxencia - Concentración venres 4 de novembro, 19h, por entrada do gaseiro nº 217

Compartimos unha nova convocatoria do Comité Cidadán de Emerxencia motivada pola entrada do gaseiro nº 217 na planta ilegal de REGANOSA:




CONCENTRACIÓN

Venres, 4 de Novembro de 2016.

ás 19 horas (sete da tarde)

diante do Edificio da Xunta de Galicia

Praza Amada GarcíaFerrol


Imaxe: http://www.fotothing.com/siguesbuscando/photo/b577c867119a23dc5bca17cf46bbb361/
 

PLANTA DE GAS: PECHE XÁ !


Mostra "Cinema e Sociedade 2016" - Xoves 3 de novembro, 19h : o Alzheimer

Compartimos unha semana máis información dos actos relativos á Mostra "Cinema e Sociedade 2016" que están a ter lugar no Ateneo Ferrolán. Esta semana, o xoves 3 de novembro ás 19h estarán centrados no Alzheimer:



Comunicado sobre a Homenaxe a Camilo Nogueira o 11 de novembro en Santiago de Compostela

Dende a Asociación Cultural Fuco Buxán saudamos aos promotores da iniciativa e adherimonos á mesma.

O recoñecemento de Fuco Buxán ao noso benquerido compañeiro Camilo Nogueira, pola súa longa traxectoria de compromiso a prol dos dereitos do pobo galego e das súas clases populares.

Asemade, felicitámonos por seguir contando coa súa contribución a facer un mundo mais xusto, libre e igualitario.

Ferrol a 02 de Novembro de 2016 


Máis información:  https://www.facebook.com/groups/202695430142534/?fref=ts

A+ | a-

Séguenos no Twitter