Ducias de persoas voluntarias participan nos actos para denunciar o masacre de menores palestinos polo Exército Israelí.
Abdullah Mohammed, Abdullah Alsayed, Hamed Suleiman, Mohameed Amer Yasser Al-Masri, Joud Mohammed Nour Hassenein.... Estes son só algúns dos 20.000 nomes dos nenos e nenas asasinados por Israel na Faixa de Gaza durante estes dous anos. Algúns, esmagados baixo os cascallos dun edificio civil atacado nun bomdardeo israelí, outros queimados vivos en tenas de refuxiados polas bombas de Israel, outras asasinados dun tiro na testa por un francotirador do Exército israelí cando facían cola para obter axuda humanitaria, outras de desnutrición...
En Ferrol e A Coruña esta sexta feira escoitáronse os nomes dos nenos e nenas asasinados no xenocido de Gaza. “Os nomes” na Coruña e “As crianzas teñen nome en Ferrol”. O primeiro organizado por BDS e Cuac Fm, o segundo pola plataforma Ferrol por Palestina.
Nos actos participaron ducias de persoas, que se foron aquendando para ler un a un os nomes das menores asasinadas. Estas cidades collen así o relevo doutras onde xa se desenvolveu esta lectura pública, como Ourense, onde máis de 100 persoas voluntarias participaron no acto, que se desenvolveu durante case 10 horas. En breve, outras cidades galegas van realizar tamén estas lecturas publicas, estando actualmente na fase de inscrición de voluntarias para participar nas mesmas.
Polo menos un neno ou nena palestino foi asasinado cada hora de media polas forzas israelís en Gaza durante estes meses de xenocidio, segundo Save the Children e outras ONG que traballan coa infancia. Os últimos datos publicados pola Oficina de Medios do Goberno en Gaza mostran que polo menos 20.000 nenos e nenas —aproximadamente 2% da poboación infantil de Gaza— foron asasinados desde outubro de 2023.
Polo menos 1.009 dos nenos e nenas asasinados tiñan menos dun ano de idade, e case a metade (450) destes bebés naceron e morreron durante a guerra.
