Asociación Cultural Fuco Buxán

Xoves 27: Ruper Ordorika e Isaac Xubín, recital "Tempo de exilio" na Coruña

Compartimos esta invitación que fai a Editorial Kalandraka para asistir ao concerto que terá lugar este xoves 27 de outubro, ás 20:30h no espazo Linda Rama da Coruña: da man de Ruper Ordorika e Isaac Rubín, recitarán e cantarán a J. Sarrionandia.




RUPER ORDORIKA E ISAAC XUBÍN INTERPRETAN A OBRA DE SARRIONANDIA NUNHA XIRA DE RECITAIS POÉTICOS EN COMPOSTELA, VIGO E A CORUÑA

Os versos de Joseba Sarrionandia recompilados na antoloxía “Tempo de exilio”, soarán en galego e en éuscaro grazas ás voces do tradutor da obra na nosa lingua, Isaac Xubín, e do cantautor vasco Ruper Ordorika. Ambos protagonizarán unha xira de recitais poéticos que se van celebrar na Sala Capitol de Santiago de Compostela o vindeiro 25 de outubro, no Café De Catro a Catro en Vigo o día 26, e o 27 no espazo Linda Rama da Coruña, todos ás 20:30 horas e con entrada de balde.

“Tempo de exilio” –polo que Isaac Xubín recibiu o I Premio Etxepare-Laboral Kutxa de Tradución 2015– é a primeira escolma de poemas de Sarrionandia publicada nunha lingua distinta á orixinal en éuscaro. Sarrionandia é un dos máximos referentes da literatura vasca moderna, autor dos títulos máis sobranceiros da lírica vasca posterior a Gabriel Aresti, e recoñecido co Premio Aldekoa, o Premio da Crítica e o Premio Euskadi de Literatura.

Pertencente á colección Tambo do selo Faktoría K de Libros –onde Xubín tamén traduciu a escolma “Alén da fronteira” (Premio Lois Tobío de Tradución 2012) coa obra de sete poetas vascos–, a edición bilingüe de “Tempo de exilio” contén poemas que se converteron na banda sonora do devir máis recente do pobo vasco, ao seren musicados por artistas como Ruper Ordorika.

O intérprete guipuscoano estará acompañado no escenario por Isaac Xubín, cantando e recitando xuntos composicións tan emblemáticas como “Martin Larralde”, “Ibaizabal” e “Poesiaren gauza galdua”.
A+ | a-

Séguenos no Twitter