NOTA DE PRENSA DAS ASOCIACIÓNS CULTURAIS
FUCO BUXÁN E MEMORIA HISTÓRICA DEMOCRÁTICA
O Consello de Ministros aprobará o vindeiro martes un recoñecemento institucional
para as vítimas dos sucesos do 10 de marzo de 1972 en Ferrol, nos que a causa da
actuación da Policía Armada naqueles feitos, foron asasinados Amador e Daniel e
resultaron feridos un número indeterminado, próximo ao centenar, de traballadores
da Empresa Nacional BAZÁN, que se manifestaban pola negociación dun convenio
de factoría e en demanda das liberdades sindicais e políticas.
Esta declaración do Goberno - ao cumprirse o 54o aniversario do que deu lugar á
conmemoración do Dez de Marzo como día da Clase Obreira Galega - subliña a
importancia do movemento obreiro organizado que, a pesar da ausencia de
liberdades, impulsou espazos de participación colectiva que contribuíron ao avance
democrático e o recoñecemento de dereitos sociais e laborais, á vez que no propio
berce do Ditador mostabase ao mundo un pobo con conciencia de clase loitando
democraticamente contra a tiranía.
Desde ambas Asociacións firmantes desta nota, valoramos positivamente o
compromiso do Ministerio de Política Territorial e Memoria Democrática, e do
Goberno, cos valores da memoria democrática, a verdade, a xustiza e a reparación
e coa Cidade de Ferrol, xa que esta declaración supón un paso máis na consolidación
de “FERROL CIDADE DA MEMORIA” na que o Monumento ás Vítimas do Dez de
Marzo, para o que hai tempo vimos reclamando a localización que lle corresponde,
será tamén motivo e elemento fundamental desta denominación.
Ferrol, 7 de marzo de 2026.
