Saltar ao contido principal

Israel xa ocupa a metade de Gaza, que responde con proxectís

Imaxe
De Fuco Buxán

 Denuncia contra 10 británicos por crimes de guerra no enclave palestino.


Tras reactivar o xenocidio en Gaza acabando co cesamento do fogo en vigor, as tropas do réxime sionista xa ocupan arredor da metade do territorio palestino, sinalou a segunda feira a axencia AP, que constatou citando cinco soldados sionistas que destruíron “todo o que puideron” nas áreas da Faixa contiguas ao territorio israelí. O pobo palestino “non volverá, nunca”, aseguraron.

En paralelo, un informe da entidade non gobernamental Breaking The Silence, que documentou relatos dos militares, ratificou que “mediante unha destrución xeneralizada e deliberada, as tropas sentaron as bases para o futuro control israelí da zona”.

Asemade, os Estados Unidos, principal aliado e provedor armamentístico israelí, sumáronse ás afirmacións sionistas, sen amosar probas, de que Hamás, que goberna Gaza, utiliza ambulancias con fins bélicos e “escudos humanos para o terrorismo”, nunha tentativa de xustificar o asasinato a finais de marzo dun grupo de 15 palestinos (paramédicos, membros de Defensa Civil e un traballador da Organización das Nacións Unidas, ONU) “un a un” por parte dos sionistas, segundo reportou o organismo internacional. 

O que si está corroborado é o uso de palestinos como escudos humanos por parte dos militares sionistas na Faixa.

Malia o apoio estadounidense e da Unión Europea (UE), que lle garante impunidade polo xenocidio, o primeiro ministro do Goberno de ultradereita israelí, Benjamin Netanyahu, tivo que alongar o traxecto da súa viaxe aos Estados Unidos, onde chegou o domingo, para evitar pasar por varios países que o poderían deter en caso de aterraxe de emerxencia por mor da orde de arresto contra el por crimes de guerra e contra a humanidade emitida polo Tribunal Penal Internacional (TPI).

Neste contexto, e a pesar da insistencia de Netanyahu en que seguiría bloqueando o acceso de axuda humanitaria a Gaza, que se estende hai máis dun mes, medios sionistas transmitiron que programa permitilos nas próximas semanas por temor ás consecuencias internacionais.

Á vez, os bombardeos indiscriminados contra os civís continúan en Gaza, onde case 50.700 palestinas e palestinos foron asasinados no xenocidio, e 10 proxectís foron lanzados desde Gaza en dirección a Israel.

No Reino Unido, un avogado de dereitos humanos anunciou que presentará unha denuncia por crimes de guerra contra 10 británicos integrados no Exército israelí durante o xenocidio en Gaza, inculpados por asasinatos selectivos de civís e traballadores humanitarios ou ataques indiscriminados contra instalacións civís como hospitais.