Milleiros de persoas claman contra o proxecto de Altri: "Aquí está a sociedade galega que non vai deixar que a calen"
Máis de 100.000 persoas, segundo a organización, percorreron as rúas de Santiago de Compostela para protestar contra o proxecto que Altri quere instalar en Palas de Rei (A Ulloa).
Máis de 100.000 persoas, segundo a organización, percorreron as rúas de Santiago de Compostela para protestar contra o proxecto que Altri quere instalar en Palas de Rei (A Ulloa). Baixo o lema 'A Xunta non pode calar todo un país. Altri Non', a manifestación partiu da Alameda compostelá ao redor das 12 horas e os asistentes clamaron contra os plans da multunacional lusa nas rúas do centro da capital galega até chegar á praza do Obradoiro.
"A cantidade de xente presente en Compostela obrigou á organización a baleirar e encher o Obradoiro en dúas ocasións e o manifesto tivo que ser lido dúas veces, mentres o Obradoiro estaba ateigado, parte da mobilización estaba aínda na Alameda na saída da marcha", salientou a organización.
"Unha hora despois do comezo da manifestación a Alameda seguía ateigada de xente cara ao Obradoiro. Trátase dunha mobilización histórica á altura da que acolleu Compostela o 1 de decembro de 2002 polo Prestige", engadiron as organizacións convocantes da manifestación contra Altri en Compostela.
En declaracións aos medios antes de iniciar a marcha, a presidenta de Ulloa Viva, Marta Gontá, asegurou que "este proxecto vai en contra da maioría social da Galiza". "As nosas fillas van herdar unha ría produtiva, unha terra fértil, aire limpo e auga limpa, non é negociábel", aseverou Gontá.
Así mesmo, o presidente de PDRA, Xaquín Rubido, fixo fincapé en que a manifestación deste domingo vai ser "algo singular e algo importante que vai marcar un antes e un despois". Neste sentido, foron varios os e as líderes políticas que se sumaron a esta manifestación, entre eles, a voceira nacional do BNG, Ana Pontón, a viceportavoz do grupo socialista no Parlamento da Galiza, Lara Méndez, ou o secretario xeral de Sumar Galicia, Paulo Carlos López, entre outras.
"Campaña da Xunta"
Despois da campaña emprendida pola Xunta da Galiza en defensa da empresa Altri e contra a cidadanía e o rexeitamento do PP no Parlamento á ILP para declarar de interese xeral o sector tradicional do mar produciuse o veto cos votos do PP e a extrema dereita europea (Patriots for Europe) para impedir que a plataforma estea en xaneiro en Bruxelas "explicando a nosa posición e mesmo que se fale de Altri no Europarlamento".
Mentres o Partido Popular Europeo asegura nun escrito que "este tema non preocupa á sociedade galega", a representación das dúas plataformas convocantes deixou claro que "aquí está a sociedade galega que non vai deixar que a calen, nin en Santiago nin en Bruxelas". Gontá e Rubido convidaron o PP e a Xunta a que "si tan claro teñen o bo que é o proxecto da macrocelulosa amplíen os prazos de alegación e deixen que se debata na sociedade e poidamos decidir libremente". "Porque a Xunta non está lexitimada para mudar o modelo produtivo deste país xa que o PP non o expuxo este proxecto nas eleccións autonómicas", acrecentaron.
A convocatoria da manifestación levou este domingo a Santiago máis de 40 autobuses fretados pola veciñanza, concellos, asociacións e outros colectivos que levan meses apoiando esta loita veciñal. Todos os "grupos vivos" que levan case un ano traballando nos distintos concellos contra a macrocelulosa, asociacións, produtoras, colectivos ecoloxistas, sindicatos e formacións políticas encheron Compostela dun "berro en defensa do noso territorio, do noso modelo de país, o noso pasado, presente e futuro", con pancartas e mesmo un río Ulla cunha tea de 150 metros que levou a Santiago o impacto real desta macrocelulosa en todo o territorio "da Ulloa á Arousa".
Manifesto no Obradoiro
Nunha praza do Obradoiro ateigada de xente, que se quedou pequena para que entraran todos os manifestantes que este domingo acudiron a Santiago, Leti da Taberna e Lois Pérez deron a benvida aos milleiros de persoas asistentes. No escenario, colocado na praza debaixo do despacho da Xunta da Galiza no Pazo de Raxoi, a mariscadora de Carril María Porto, a bateeira de Vilanova Marta Juncal, a bibliotecaria de Antas Teresa Batán e Ximena de Agolada, deron lectura ao manifesto.
"Hai un ano recibíamos a noticia, Altri é unha sombra que sobrevoa a terra do medio, e pretende botar raíces nas nosas comarcas como unha mala herba e chuchar a nosa auga e verter a súa merda ao río e á atmosfera de por vida, durante 75 anos. O proceso administrativo para captar as augas e verter a merda comezaba", explicaron, sinalando que naquela altura "na Xunta estaban seguros que tiñan todo ben atado e os feixes de cartos repartidos, neste conto os beneficiados son unha minoría de privilexiados que queren botarnos do noso territorio".
Repasaron no manifesto este ano de loita, "a cada mes que pasaba, eramos máis as voces que berrabamos contra o proxecto de Altri-Greenalia", desde aquela as manifestacións de Palas de Rei, a ría de Arousa e o Arrodea San Caetano. Tamén se referiron ás máis de 23.000 alegacións ao proxecto e ao informe do Consello da Cultura Galega do pasado mes de setembro.
Lembraron, así mesmo, que hai dous meses o PP votou en contra de admitir a trámite no Parlamento galego a Iniciativa Lexislativa Popular para recoñecer o interese xeral da pesca de baixura, o marisqueo e o mexillón, "mais non teñen reparos en declarar proxectos estratéxicos Altri ou a mina de Touro, porque non queren que esteamos en pé de igualdade con eles, para así poder explotar os nosos recursos despregando unha estratexia de extractivismo colonial".
Referíronse tamén aos requirimentos que a Xunta leva meses mandando aos alegantes cuestionando a condición de "interesados" no procedemento, mais advertiron "que non perdan o tempo! Nin nos van calar, nin nos dan medo!". Cuestionaron tamén os 250 millóns de euros de cartos públicos para o proxecto, que "servirían para sanear as rías e rexenerar os bancos marisqueiros" e alertaron de que a contaminación de Altri no Ulla "afecta a calidade da auga potábel que bebemos 145.000 veciños e veciñas" e de que esa contaminación do río Ulla chegaría "en 24 horas á ría de Arousa".
As lectoras do manifesto deixaron claro despois destes meses de loita que "Altri é un proxecto contrario á creación de emprego digno e á sostibilidade económica e social porque atenta contra todos os sectores económicos e produtivos do mar e do agro que xeramos riqueza social". Advertiron ademais, de que "o berro de Altri Non, será cada vez máis forte porque defendemos a nosa dignidade e o noso dereito a vivir e traballar dignamente na nosa terra".
Finalmente, concluíron que "non somos terra de sacrificio, a lexitimidade está da nosa parte, da parte do pobo. Ningunha mordaza nas nosas bocas. Todas xuntas, porque esta loita berrará sempre: Altri non". Ao remate da lectura do manifesto comezou a música para celebrar de novo a unión e o apoio de todo o país, "da terra e do mar", xunto contra a macrocelulosa. O Coro Encaixe e as Músicas da Ulloa encheron o Obradoiro de emocionantes argumentos cantados contra o proxecto.
Solidariedade desde Barcelona
Compostela non foi a única cidade que albergou unha mobilización contra o proxecto que a multinacional lusa Altri quere desenvolver en Palas de Rei. A solidariedade coa causa defendida na capital galega tamén chegou a Catalunya. Así, varias decenas de persoas concentráronse en paralelo en Barcelona para dicir que "outro mundo é posíbel" e berrar "Altri non".
Declaracións de Ana Pontón
A portavoz nacional do BNG, Ana Pontón, cualificou de "histórica" a manifestación deste domingo en Compostela contra o proxecto que Altri, na que "unha marea de dignidade" dixo ao PP que "non quere a macrocelulosa no corazón do país".
En declaracións aos medios antes de comezar a marcha, a nacionalista lembrou que este "megaproxecto contaminante que non queren en Portugal" pon "en risco" 8.000 empregos e o modo de vida da xente do rural e do mar.
"Pedimos a Rueda que escoite á cidadanía da Galiza, que deixe de ser comercial de Altri e que pare esta agresión, esta bomba ambiental que é unha hipoteca para o futuro do noso país", esgrimiu a portavoz nacional do BNG.
Declaracións de Lara Méndez
A viceportavoz do grupo socialista no Parlamento da Galiza, Lara Méndez, incidiu en que "quere saber toda a información" sobre o proxecto que Altri xa que "os datos difiren" dos presentados nun inicio. En declaracións aos medios durante a manifestación deste domingo en Compostela, a socialista apuntou que este proxecto "naceu como unha fábrica téxtil e agora atopámonos cunha celulosa".
"Desde o PSdeG sempre defendemos que este tipo de iniciativas teñen que cubrir tres patas, a económica, mais tamén a social e a medioambiental e este proxecto non cobre ningunha destas patas", sinalou, á vez que reclamou ao PP explicacións sobre "porqué difiren tanto os datos". En canto á ausencia na manifestación do secretario xeral da formación, José Ramón Gómez Besteiro, asegurou que tiña "un compromiso adquirido con anterioridade".
Declaracións de Paulo Carlos López
O secretario xeral de Sumar Galicia, Paulo Carlos, asegurou que a súa formación porá "todo o seu capital político, enerxía e forza" para "parar" o proxecto Altri en Palas de Rei. Así o fixo este domingo durante a manifestación que acolle a capital galega e na que a sociedade di "unha cousa moi clara: Altri Non". "Non é viábel, non é sostíbel, non produce postos de traballo de calidade e, desde logo, non é unha Galiza con futuro", remarcou.