Mohamed Safa, médico palestino residente na Galiza: "As ambicións coloniais de Israel van máis aló das fronteiras de Palestina"

Incansábel loitador polos dereitos do pobo palestino, o médico Mohamed Safa leva toda a vida residindo en Corcubión. Resistente desde a diáspora, levanta a súa voz contra unha guerra colonialista e xenocida que ameaza todo o fondo do Mediterráneo e Oriente Medio baixo o apoio de Europa e os Estados Unidos.

— Estamos a asistir ao exterminio do pobo palestino á vez que á destrución da Declaración dos Dereitos Humanos?
Sen dúbida hai un retroceso porque a extrema dereita volve cun discurso que cuestiona os valores que se conquistaran en Europa desde a II Guerra Mundial. Chega con observar o que Israel está a facer desde o 7 de outubro de 2023 e o sentimento xeneralizado de que unha vida israelí vale máis que a dun palestino e de que o sufrimento dos palestinos é necesario para garantir a seguridade do Estado de Israel. A xente ve as imaxes do xenocidio e arrepía pero como di un escritor libanés “cunha compaixón narcisista”, xa que o sentimento é distinto cando ven sufrir un deles ou un de nós; débennos considerar doutra categoría humana.— Desde un punto de vista xeopolítico, non coida que Occidente crea e mantén o Estado de Israel como unha cabeza de mísil para dominar a rexión?

Primeiro os europeos trasladáronnos o seu antisemitismo; segundo, o Estado de Israel representa a única vía para impedir a solidariedade e a unión do mundo árabe e terceiro, a súa creación formaba parte do que foi o eixo da guerra fría. Hoxe séguennos vendo como unha terra colonizábel e o mundo árabe como unha zona para seguiren controlando e explotando segundo os seus intereses. O mundo árabe non é só importante polo petróleo, senón porque das vías marítimas importantes do mundo, sete están no mundo árabe: Bab al Mandeb, a Canle de Suez, Bósforo, Ormuf, etc e todo o comercio internacional pasa por estas vías.

— Netanyahu no seu discurso ante a asemblea da ONU, baseándose nesa importancia dos pasos comerciais entre Occidente e Oriente, mostrou o que el cualificou como o mapa do mal e o mapa do ben. No mapa do mal situaba a Irán, Iraq, Siria e Iemen. No do ben situaba Exipto, Sudán, Xordania, Arabia, Kuwait, Emiratos finalizando en India.
Precisamente son estes os países que regularizaron a súa relación con Israel ou están en vías de facelo e os que rexeitan a ocupación representan para el o eixo do mal. Por iso Israel quere mostrarse ante o mundo como a vítima de toda unha maldade para que algúns países poidan dicir que eles teñen o dereito á defensa. Síntoo, mais quen di isto está a violar as leis internacionais porque non hai dereito á defensa dun Estado que ocupa o territorio doutro. O único dereito recoñecido é o que ten un pobo oprimido á resistencia. Hai que cambiar o chip. Se vostede defende o dereito internacional, direille que non, que Israel non ten dereito á defensa e o que ten que facer é suxeitarse á legalidade internacional.

— Cando se fala das solucións a esta guerra, mantén que non é posíbel a solución dos dous Estados, compáraa con propor a unha muller maltratada chegar a un acordo para convivir co seu maltratador. Non sendo a solución dos dous Estados, cal sería?
Para empezar hai que desmontar ese pensamento colonial sobre os palestinos. Non somos un pobo colonizábel nin somos un territorio colonizábel. Unha vez desmantelado este pensamento hai que buscar as fórmulas para unha convivencia pacífica dentro do territorio palestino. Hai 30 anos había unha terra palestina que podería albergar unha solución diplomática. Hoxe en día esa terra non existe porque Israel estendeu as súas colonias, ocupou máis terra e expulsou máis palestinos. Realmente agora é imposíbel crear dous Estados.

— A expansión actual do Estado de Israel máis aló das súas fronteiras ao entrar no Líbano e bombardear Iemen e Siria é, entre outras cousas, unha forma de diluír a causa palestina?
Hai trinta anos que nós dixemos que Israel quere Palestina pero a fronteira de Israel non fica en Palestina. Chamáronnos esaxerados. Co paso do tempo xa se ve claramente que as ambicións de Israel van máis aló das fronteiras de Palestina. Teñen un proxecto colonial amplo. É un Estado baseado na forza, cunha maquinaria e unha capacidade destrutiva que determina até onde poden chegar. Agora mesmo queren ampliar as súas fronteiras entrando no sur do Líbano deica o que denominan a súa “zona de seguridade”.

— É o Irán o obxectivo último dos EUA nesta expansión da guerra?
Desde o primeiro momento a política de Netanyahu foi implicar os EUA nunha guerra rexional ampla. Este era o seu proxecto. Desde hai anos sinalan o Irán como o gran perigo e teiman por atacalo. Cunha Administración americana debilitada onde os dous candidatos á Presidencia pelexan por demostrar maior sintonía co Estado de Israel, Netanyahu ve que ten as mans libres para ocupar e colonizar o máximo territorio posíbel. Pero eles nunca gañarán a guerra porque a nosa forza baséase nunha fe absoluta en que estamos asistidos polo dereito e polo anceio de vivir libres e dignos na nosa terra.

O apoio desde Galiza á causa palestina

"Cando se creou Galiza por Palestina, e eu fun un dos promotores, díxenlle aos compañeiros que aquí non era necesario espertar a solidariedade con Palestina porque o pobo galego xa apoia maioritariamente a cuestión palestina", lembra Mohamed Safa. O que hai que facer, sinala, "é formar unha asociación cunha capacidade universal e colectiva que sexa quen de canalizar todo ese apoio que estamos a ver nas manifestacións de apoio a Palestina en todas as vilas e cidades do pais. Unha asociación que sitúe o conflito nos seus xustos termos e que faga ver que este é un conflito colonial
e que a nosa loita é unha loita de descolonización". Se o sacamos deste contexto, "perdemos a batalla", asevera Mohamed Safa.