Non nos sometemos á censura do PP! O 25 DE ABRIL HABERÁ ACTO SOBRE LENIN EN FERROL!
Equiparar a Lenin con Hitler non só é unha terxiversación histórica escandalosa, senón que é un insulto á
memoria de decenas de milleiros de militantes comunistas (unha parte españois exiliados trala vitoria
franquista) que xogaron un papel decisivo na derrota do fascismo na Segunda Guerra Mundial. Vencellar
a Lenin co stalinismo é outra terxiversación histórica, non só porque Lenin morreu en xaneiro de 1924,
senón porque na última etapa da súa vida Lenin loitou contra el, ata o punto de que no seu chamado
“Testamento político” pedía a destitución de Stalin como secretario xeral do Partido Comunista soviético.
A dereita ataca a Lenin porque non lle perdoa que encabezase a primeira revolución socialista triunfante
da historia. Odia a Lenin porque encarna a idea de que os traballadores e traballadoras podemos acabar co
capitalismo e transformar a sociedade. Os representantes do PP saben que minten, igual que o sabía
Esperanza Aguirre cando hai uns días afirmou que a culpa da guerra civil foi do PSOE. Pero dálles igual
porque teñen unha mentalidade autoritaria. Sempre foron uns franquistas vergoñentos, pero cada vez
perden máis a vergoña, como demostra a derrogación das leis de Memoria Histórica en varias
autonomías onde gobernan con Vox (alianzas ás que non lles aplican a resolución esa do Parlamento
Europeo que esgrimen contra o noso acto, a pesar do carácter fascista de Vox). Esquerda
Revolucionaria e a Fundación Federico Engels non aceptamos a censura. Ata o ultimo minuto
intentaremos que o presidente do Ateneo Ferrolán rectifique e, por tanto, MANTEMOS A
CONVOCATORIA DO ACTO para este xoves 25 de abril ás 7 da tarde no Ateneo Ferrolán. E se
finalmente o acto non pode desenvolverse dentro do Ateneo, celebrarémolo noutro lugar. A dereita non
vai lograr impoñer a súa censura reaccionaria! O 25 DE ABRIL ÁS 7 DA TARDE VAI HABER UN
ACTO SOBRE LENIN EN FERROL SI OU SI! No mesmo intervirán Xaquín García Sinde, dirixente
sindical en Navantia, e Víctor Taibo, madrileño con raíces na nosa cidade (seu pai é o ferrolán Rafael
Taibo, coñecido locutor xa xubilado de Radio Nacional, emisora que abandonou por motivos políticos durante o franquismo e á que retornou tralo fin da ditadura). Ferrol, a 24 de abril de 2024