Queda pouco xa para o Encontro Internacional Acampa pola Paz 2024, que se desenvolverá na cidade da Coruña do 7 ao 9 xuño. O tema troncal das xornadas será a “Infancia e Mocidade Refuxiada”, pero resulta imposible non mirar cara a Gaza, cara a Ucraína, cara á fronteira sur, cara a Afganistán, Iemen… Por iso, o cartel da cita deste ano é así, con esta imaxe do fotógrafo palestino Majdi Fathi como protagonista.
Así o decidiu o completo equipo multidisciplinar e voluntario que coordina esta cita reflexiva sobre os Dereitos Humanos e o Dereito a Refuxi, que convirte á cidade da Coruña dende 2017 nun referente nacional do xornalismo humanitario e do compromiso na defensa dos DDHH.
“A imaxe é o mellor resumo da desolación e a esperanza ao tempo, ao fotografar a ese neno salvando dos entullos os seus libros e cadernos, agarrándose á normalidade e ao futuro arrebatados polas bombas israelitas que converteron en cascallos toda a súa vida, enterrando en segundos a súa infancia”, explica Sofía Reyes, unha das responsables da área de comunicación.
Rede Acampa
Rede Acampa pola Paz e o Dereito a Refuxio quere ser, de novo, “o altofalante para a reivindicación colectiva que esixa accións urxentes, a nivel internacional, imprescindibles para minimizar o dano e para facilitar a incorporación desa infancia e mocidade, canto antes, a unha vida digna”.
Durante eses días de xuño, os Xardíns de Méndez Núñez serán o espazo no que se confirme de novo que A Coruña é unha cidade sensible á dor humana. Especialistas, activistas, fotógrafos e fotógrafas especializadas en Xornalismo Humanitario, ONGs, documentais, música… conformarán o programa de ACAMPA2024. Tamén haberá de novo o que é xa o seu aceno de identidade, un campo de persoas refuxiadas simulado que, nesta edición, permitiranos entender como están actualmente millóns de persoas desprazadas dentro da Franxa de Gaza, sobrevivindo sen auga, sen comida e sen pertenzas baixo os ataques e o acoso permanente de Israel. As 7 exposicións que na presente edición están programadas continuarán nas rúas ata o 30 de xuño.
“Infancia e Mocidade Refuxiada”: En shock emocional, sen dereito a ser nenos, criminalizados
Como dicimos o tema principal, centrarase nos alarmantes datos de ACNUR do ano 2023. A cifra de persoas desprazadas forzosamente supera xa os 114 millóns de persoas. A metade desa cifra son nenos e nenas menores de 18 anos, unha infancia vulnerable constantemente en tránsito. En moitas ocasións chegan sen familia, ou a perden no proceso migratorio, están enfermos, en shock emocional, son criminalizados, ven obrigados a renunciar, durante anos, ao seu dereito para escolarizarse, a aprender… En definitiva, a medrar como debe facelo calquera neno. As organizacións humanitarias que traballan en moitos destes campos e espazos de atención e acollida –Sudán, Bangladesh, Afganistán, Siria, Gaza, as illas italianas e gregas, as Canarias, Ceuta, Melilla, o paso do Darién, a fronteira entre México e EEUU…- alertan desde hai anos dos riscos que corren neses tránsitos: deterioración da súa saúde tanto física como mental, secuestros, explotación sexual, tráfico de órganos…
A Rede Acampa prepara xa o Encontro Internacional Acampa pola Paz que se celebrará na Coruña entre o 7 e o 9 de xuño. Un evento que este ano virará ao redor da “Infancia e a Mocidade Refuxiada”. E para ter todo o preparado, invita a veciñanza a participar na elección da persoa ou colectivo … Segue lendo
