Máis dun centenar de alumnos e alumnas de 4º da ESO e 1º e 2º curso de Bacharelato do IES Fernando Esquío inauguraron esta mañá o programa “Educando en patrimonio e historia” que promove o Concello de #Neda. Un programa de visitas guiadas dirixido aos centros educativos do municipio que arrancaba na exposición fotográfica “A fuxida do Bou Ramón” que trae estes días á Casa das Palmeiras de Neda a Asociación Cultural Memoria Histórica Democrática. Alí, Fernando Ocampo, da entidade, actuou de guía para os 115 estudantes nedenses, repartidos en dous grupos, que participaron na iniciativa. Durante a visita, Ocampo repasou pormenorizadamente a historia dos 27 republicanos da comarca que fuxiron do porto de Ares neste barco pesqueiro o 21 de xullo de 1939 tras permanecer agochados nos montes e outros refuxios tratando de evitar a morte e na procura da liberdade.
O programa continuará esta semana con alumnado de Primaria, que visitará as instalacións da Fábrica de Xubia, hoxe sede da firma Galicia Téxtil, cun repaso polos seus máis de 200 anos de historia.