Rede Galega en Apoio ás Persoas Refuxiadas. COMUNICADO ANTE AS RECENTES MORTES NA FRONTEIRA SUR Desde a Rede Galega en Apoio ás persoas Refuxiadas condenamos a situación de violencia vivida antonte na fronteira de Marrocos con Melilla e que custou a vida, polo momento, de polo menos a 27 persoas e máis de 300 feridos. Non son números, pois cada unha delas tiñan e teñen un nome, unha historia, unha familia e uns soños para realizar. A través deste comunicado, declaramos que a represión violenta exercida por parte das Forzas e Corpos de Seguridade do Estado español e da Xendarmería marroquí ante o intento de acceso pola zona do valado fronteirizo do Barrio Chinés, en Melilla, responde a unha das expresións máis sanguentas das prácticas das nosas políticas migratorias. Uns actos violentos que revelan a estrutura racista e xenófoba desas políticas porque atacan e discriminan ás persoas segundo o seu perfil étnico e procedencia, aínda a pesar de ser persoas que foxen de guerras, como as que tentaron acceder á Cidade autónoma no día de onte. Moitas destas persoas que viviron este desamparo proceden de Chad e de Sudán, países que, do mesmo xeito que outros moitos, atópanse inmersos en conflitos bélicos desde hai moitos anos e das que ACNUR recoñece o seu estatuto de persoas refuxiadas. Non comprendemos como o presidente do Goberno pode felicitar a Marrocos antes as mortes e as imaxes que nos deixou a xornada de antonte e que puidemos ver a través dos medios de comunicación. É por iso que denunciamos a dobre vara de medir co que se trata ás persoas procedentes de determinados países cando, hai apenas 3 meses, demostrouse que cando existe vontade política, a acollida e o establecemento de vías legais e seguras para as persoas que necesitan protección das súas vidas poden ser un feito e actívanse rapidamente con todas as garantías necesarias. Por todo iso, esiximos que se respecte a lexislación internacional, que non cousifiquen máis vidas para utilizalas como bens intercambiables e que se habiliten vías legais e seguras que permitan ás persoas exercer os seus dereitos de solicitude de asilo e refuxio e de migrar, preservando a súa integridade física e mental. Esiximos responsabilidades ao goberno de España por unhas mortes sucedidas en instalacións financiadas con cartos entregados a Marrocos para o control de fronteiras e reclamamos unha investigación que esclareza os feitos, o cese do uso de material antidisturbios contra persoas vulnerables e que se garanta o principio de non devolución, permitindo o acceso efectivo ao dereito de asilo das persoas que conseguen cruzar. Esiximos á Unión Europea que acabe coa súa estratexia de externalización de fronteiras, e promova unha política migratoria baseada na seguridade humana, na protección dos dereitos humanos e nas relacións exteriores xustas. Expresamos a nosa solidariedade coas vítimas e as súas familias e a nosa dor ante unha política que provoca morte acotío. Migrar é un dereito, non é un delito.