OS RESTOS DO FRANQUISMO EN FERROL E GALIZA
Conferencia de Manuel Monge. Xoves, 3 de marzo ás 19,30 horas
No Ateneo Ferrolán
Manuel Monge, mestre e sociólogo, é membro do colectivo de presas e presos políticos de Ferrol na ditadura. Estivo dous meses no cárcere da Coruña con motivo da mobilización en Ferrol contra o Proceso 1001 e despedido do Colexio Tirso de Molina.
Novamente despedido “por orden gubernativa”, cando traballaba como mestre no antigo Colexio Público Ibáñez Martín de Ferrol.
Nesta conferencia explicará o contido do seu libro OS RESTOS DO FRANQUISMO EN GALIZA, que recolle máis de 600 símbolos franquistas en 90 concellos. Ferrol conserva hoxe 50 símbolos franquistas, que deberían estar xa retirados en aplicación da Lei de Memoria Histórica.
O Pleno da corporación de Ferrol de 2 de marzo de 1981 aprobaba a retirada de 61 rúas relacionadas co franquismo. Moitas delas consérvanse no Arsenal Militar de Ferrol a pesar de que o Pleno da corporación municipal aprobou en varias ocasións solicitar ao Ministerio de Defensa a retirada desas rúas. O colectivo de presas e presos políticos de Ferrol denunciou ao Ministerio de Defensa ante a Fiscalía de Galicía por este incumprimento da Lei de Memoria Histórica, que foi remitida recentemente á Fiscalía
do Tribunal Supremo.
Estas son as nove rúas que se conservan no Arsenal Militar: Salvador Moreno Fernández, José María González-Llanos, Soldado Lois, Almirante Fernández Martín, Almirante Vierna, Cándido Pérez, Crucero Baleares, Almirante Honorio Cornejo e Marqués de Alborán.
Aínda conservan a distinción de Fillos Adoptivos ou Predilectos de Ferrol os seguintes ministros de Franco: Pedro Nieto Antúnez, Gonzalo Fernández de la Mora y Mora, José María Martínez y Sánchez-Arjona, Manuel Lora Tamayo, Jorge Vigón Suerodíaz, Fernando Suárez de Tangil y Angulo, Pablo Martín Alonso, Salvador Moreno Fernández, Juan Antonio Suanzes Fernández. Tamén son Fillos Adoptivos o golpista Francisco Núñez Rodríguez –almirante da Armada e Capitan Xeneral da Zona Marítima
do Cantábrico– e o falanxista Enrique Salgado Torres.
O militar golpista Juan Cardona dá nome a un hospital de Ferrol e no seu aparcamento consérvase unha escultura dedicada ao golpista Camilo Alonso Vega, coñecido na ditadura polo seu papel represor como Ministro de Gobernación. Sinala a placa:
“Capitán General, hijo predilecto de la ciudad, soldado heroico, gobernante ejemplar”.
A Igrexa castrense de San Francisco é un auténtico museo de exaltación do franquismo cunha cruz “a los caídos por Dios y por España” e unha placa “a los gloriosos caídos del Baleares”.